Mæðraskoðun með meiru

Daginn, daginn, daginn

Mættum enn og aftur í mæðraskoðun í dag en þetta var ekki neitt venjuleg skoðun því Sonja var í verknámi! Það var hin skemmtilegasta tilbreyting á annars einhæfri mæðraskoðun. Blóðþrýstingurinn er 120/70 sem telst fullkomlega eðlilegt. Barnið er búið að skorða sig betur núna og kom einnig í ljós að ég er komin með hina víðfrægu grindargliðnun Á FYRSTA STIGI vil ég meina. Það var nefnilega þannig að ég fór með Hervöru og Ástu í kröfugönguna í gær og var á vappinu í rúma tvo tíma og þegar ég lagðist upp í rúm um kvöldið var ég komin með þessa skemmtilegu verki í lífbeinið (pent orðað!)
Jæja, hvað um það. Fór í göngu með Mugg áðan og það er víst ekki eitthvað sem ég á eftir að gera mikið af næstu vikurnar því lífbeinið tók af stað. Það er nú bara eitthvað aumt brjósk sem heldur beininu saman og mamma sagði mér að barnið væri farið að ýta á það svo að þess vegna finnur maður fyrir þessum ónotum.

Það skemmtilega við mæðraskoðunina var fyrst og fremst að Sonja var þarna og svo þegar Gígja, ljósmóðirin, athugaði hvernig barnið lægi, hve langt það væri komið niður og svona spurði ég Sonju hvort hún vildi prufa ... enda í skólanum, strangt til tekið ... hún var til í það og fann hausinn á barninu. Gígja spurði hvort pabbinn, a.k.a Sverrir, vildi finna og ég hélt hann myndi nú ekki láta verða að því þar sem hann er svo smeykur við að meiða barnið, en hann lét til leiðast og fann líka fyrir höfðinu. Svo fann Sonja bakið og rassinn og allt svoleiðis.

Hin besta skoðun að mínu mati- OG - Sonja er komin með mega flotta klippingu!

xx Rúna